Id-Direttiva tal-Kummissjoni 2000/19/KE

tat-13 ta' April 2000

li tadatta għall-progress tekniku d-Direttiva tal-Kunsill 86/298/KEE dwar strutturi mmuntati fuq wara bħala protezzjoni kontra t-tgerbib ta' trakters bir-roti ta' spessuri dojoq għall-użu fl-agrikoltura jew fil-foresti

(Test b'rilevanza ŻEE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat id-Direttiva tal-Kunsill 74/150/KEE tal-4 Marzu 1974 dwar l-approssimazzjoni tal-liġijiet ta' l-Istati Membri fir-rigward ta' l-approvazzjoni tat-tip ta' trakters bir-roti għall-użu fl-agrikoltura jew fil-foresti [1], kif l-aħħar emendata bid-Direttiva tal-Kummissjoni 2000/2/KEE [2], u b'mod partikolari l-Artikolu 11 tagħha,

Wara li kkunsidrat id-Direttiva tal-Kunsill 86/298/KEE tas-26 ta' Mejju 1986 dwar strutturi mmuntati fuq wara bħala protezzjoni kontra t-tgerbib ta' trakters bir-roti ta' spessuri dojoq għall-użu fl-agrikoltura u fil-foresti [3], kif l-aħħar emendata bl-Att ta' l-Adeżjoni ta' l-Awstrija, l-Finlandja u l-Isvezja, u b'mod partikolari l-Artikolu 12 tiegħu,

Billi:

(1) Sabiex tiġi mtejjba s-sigurtà, huwa neċessarju li jiġu ċċarati l-metodi għall-ittestjar ta' strutturi mmuntati fuq wara bħala protezzjoni kontra t-tgerbib ta' trakters bir-roti b'fusien ta' spessuri dojoq għall-użu fl-agrikoltura u fil-foresti waqt li jittieħed kont ta' l-għażla kbira ta' l-apparat

(2) Il-metodi għat-testijiet ta' dawn l-istrutturi għandhom jiġu armonizzati ma' dawk stabbiliti fil-Kodiċi 7 ta' l-Organizzazzjoni għall-Koperazzjoni u l-Iżvilupp Ekonomiku (OECD) dwar it-testijiet uffiċjali ta' strutturi tal-protezzjoni għal trakters għall-użu fl-agrikoltura.

(3) Id-Direttiva 86/298/KEE għandha għalhekk tkun emendata.

(4) Il-miżuri li hemm provvediment dwarhom f'din id-Direttiva huma skond l-opinjoni tal-Kumitat ta' l-Adattament għall-Progress Tekniku stabbilit bl-Artikolu 12 tad-Direttiva 74/150/KEE,

ADOTTAT DIN ID-DIRETTIVA:

Artikolu 1

L-Annessi I sa VI tad-Direttiva 86/298/KEE huma b'dan emendati skond l-Anness ta' din id-Direttiva.

Artikolu 2

1. Mill-1 ta' Lulju 2001, l-Istati Membri ma jistgħux:

- jirrifjutaw, għal tip ta' trakter, li jagħtu l-approvazzjoni tat-tip KE jew li joħorġu id-dokument li hemm provvediment dwaru fit-tielet inċiż ta' l-Artikolu 10 (1) tad-Direttiva tal-Kunsill 74/150/KEE, jew li jagħtu l-approvazzjoni nazzjonali tat-tip, jew

- jipprojbixxu l-ewwel dħul fis-servizz ta' trakters,

jekk dawk it-trakters ikunu konformi mal-ħtiġiet tad-Direttiva 86/298/KEE, kif emendata b'din id-Direttiva.

2. Mill-1 Jannar 2002, l-Istati Membri:

- ma jistgħux aktar joħorġu d-dokument li hemm provvediment dwaru fit-tielet inċiż ta' l-Artikolu10 (1) tad-Direttiva 74/150/KEE għal tip ta' trakter jekk dan ma jkunx konformi mal-ħtiġiet tad-Direttiva 86/298/KEE, kif emendata b'din id-Direttiva,

- jistgħu jirrifjutaw li jagħtu l-approvazzjoni tat-tip nazzjonali għal tip ta' trakter jekk dan ma jkunx konformi mal-ħtiġiet tad-Direttiva 86/298/KEE, kif emendata b'din id-Direttiva.

Artikolu 3

1. L-Istati Membri għandhom idaħħlu fis-seħħ il-liġijiet, ir-regolamenti u d-disposizzjonijiet amministrattivi meħtieġa sabiex ikunu konformi ma' din id-Direttiva sa mhux aktar tard mit-30 ta' Ġunju 2001. Għandhom minnufih jinformaw lill-Kummissjoni dwar dan.

Meta l-Istati Membri jadottaw dawk id-disposizzjonijiet, dawk għandhom ikollhom referenza għal din id-Direttiva jew ikunu akkompanjati b'riferenza bħal dik fl-okkażjoni tal-pubblikazzjoni uffiċjali tagħhom. L-Istati Membri għandhom jiddeċiedu kif għandha ssir dik ir-referenza.

2. L-Istati Membri għandhom jikkomunikaw lill-Kummissjoni d-disposizzjonijiet prinċipali tal-liġi nazzjonali li jadottaw fil-qasam kopert b'din id-Direttiva.

Artikolu 4

Din id-Direttiva għandha tidħol fis-seħħ fl-20 jum wara l-pubblikazzjoni tagħha fil-Ġurnal Uffiċjali ta l-Komunitajiet Ewropej.

Artikolu 5

Din id-Direttiva hija ndirizzata lill-Istati Membri.

Magħmula fi Brussel, it-13 ta' April 2000.

Għall-Kummissjoni

Erkki Liikanen

Membru tal-Kummissjoni

[1] ĠU L 84, 28.3.1974, p. 10.

[2] ĠU L 21, 26.1.2000, p. 23.

[3] ĠU L 186, 8.7.1986, p. 26.

--------------------------------------------------

ANNESS

1.2.3.4. L-Annessi I sa VI tad-Direttiva 86/298/KEE huma emendati kif ġej:

Fl-Anness I, il-punt 1 huwa mibdul b'dan li ġej:

"1. Il-ħtiġiet tal-punt 1 tal-Kodiċi 7 ta' l-OECD (Deċiżjoni C (87) 53 finali tal-24 ta' Novembru 1987, kif l-aħħar emendata fit-3 Marzu 1999), bl-eċċezzjoni tal-punt 1.1 għandhom ikunu applikati."

L-Anness II qiegħed jiġi mibdul b'dan l-ġej:

ANNESS II

ĦTIĠIET TEKNIĊI

Il-ħtiġiet tekniċi għall-approvazzjoni tat-tip KE tal-komponent ta' strutturi mmuntati fuq wara bħala protezzjoni kontra t-tgerbib ta' trakters bir-roti b'fusien ta' spessuri dojoq għall-użu fl-agrikoltura jew fil-foresti għandhom ikunu dawk stabbiliti fil-punt 3 tal-Kodiċi 7 ta' l-OECD (Deċiżjoni C (87) 53 finali ta' l-24 ta' Novembru 1987, kif l-aħħar emendata fit-3 Marzu 1999).

Dawn il-ħtiġiet tekniċi m'għandhomx japplikaw għall-kapitoli tal-punt 3 li għandhom x'jaqsmu mal-bullettin tat-test, modifiki żgħar u identifikar.

L-Annessi III, IV u V huma mħassra.

Fl-Anness VI, l-ewwel inċiż huwa mibdul b'dan li ġej:

"- rettangolu li jdawwar l-ittra "e" b'tipa żgħira segwita bin-numru li jiddistingwixxi l-Istat Membru li jkun ta l-approvazzjoni tat-tip tal-komponent:

1 għall-Ġermanja, 2 għal Franza, 3 għall-Italja, 4 għall-Olanda, 5 għall-Isvezja, 6 għall-Belġju, 9 għal Spanja, 11 għar-Renju Unit, 12 għall-Awstrija, 13 għall-Lussemburgu, 17 għall-Finlandja, 18 għad-Danimarka, 21 għall-Portugall, 23 għall-Greċja, 24 għall-Irlanda."

--------------------------------------------------