Pożizzjoni komuni tal-kunsill

tal-31 ta’ Jannar 2000

dwar il-protokoll propost, li jissupplimenta l-Konvenzjoni tan-Nazzjonijiet Uniti kontra l-kriminalità organizzata lil hinn mill-fruntieri nazzjonali, kontra l-fabbrikazzjoni u traffikar illeċiti fl-armi tan-nar, il-biċċiet u l-komponenti u l-munizzjon tagħhom.

(2000/130/JHA)

IL-KUNSILL TA’ L-UNJONI EWROPEA,

Wara li kkunsidra t-Trattat dwar l-Unjoni Ewropea u partikolarment l-Artikolu 34(2)(a) tagħha,

Wara li kkunsidra l-inizjattiva tar-Repubblika Portugiża,

Billi:

(1) L-importanza tal-koperazzjoni internazzjonali f’materji kriminali sabiex ma titħallhiex issir u tiġi kkumbattuta kull forma ta’ kriminalità serja, inkluż it-traffikar illeċitu ta’ l-armi kif ipprovdut fl-Artikolu 29 tat-Trattat, hija rrikonoxxuta.

(2) Saru arranġamenti għall-iżvilupp u negozjati ta’ protokoll, biex jissupplimenta l-Konvenjoni tan-Nazzjonijiet Uniti kontra l-kriminalità organizzata lil hinn mill-fruntieri nazzjonali kontra l-fabbrikazzjoni u t-traffikar illeċiti ta’ l-armi tan-nar, il-biċċiet u l-komponenti u l-ammunizzjon tagħhom.

(3) L-Assemblea Generali tan-Nazzjonijiet Uniti ddeċidiet li t-test finali ta’ l-abbozzi tal-Konvenzjoni u l-Protokolli tagħha għandhom jingħataw lilha sabiex jiġu adottati mill-aktar fis qabel il-konferenza għolja ta’ l-iffirmar li ser issir ġewwa Palermo.

(4) Numru ta’ strumenti internazzjonali adottati fl-Unjoni u ġewwa fora oħra diġà pprovdew miżuri ta’ adozzjoni sabiex jikkumbattu l-fabbrikazzjoni u t-traffikar illegali ta’ apparat tal-qerda.

(5) Azzjoni konġunta ġiet adottata fis-17 ta’ Diċembru 1998 fuq il-kontribuzzjoni ta’ l-Unjoni Ewropea għall-ġlieda kontra d-distabbilizzazzjoni akkumulattiva u l-firxa ta’ armi zgħar u armi ħfief [1].

(6) Hu mixtieq li ikun hemm kontribuzzjoni sħiħa kemm jista’ jkun għan-negozjati tal-Protokoll propost u sabiex ma jkunx hemm inkompatibilità mal-Protokoll propost u l-istrumenti li ħejjiet l-Unjoni.

(7) Il-Kunsill, fil-Konklużjonijiet tiegħu tal-5 ta’ Ottubru 1998 talab lill-Presidenza biex tipproponi waħda jew diversi posizzjonijiet konġunti, skond it-Trattat dwar l-Unjoni Ewropea rrelatati ma’ l-abozz tal-Konvenzjoni tan-Nazzjonijiet Uniti u l-Protokolli tagħha.

(8) Qed jittieħed kont tal-Pożizzjoni Konġunta li ġiet adottata mill-Kunsill fid-29 ta’ Marzu 1999 fuq il-Konvenzjoni proposta tan-Nazzjonijiet Uniti kontra l-kriminalità organizzata [2],

ADOTTA DIN IL-POŻIZZJONI KOMUNI:

Artikolu 1

Fin-negozjati fuq l-abbozz tal-Protokoll tan-Nazzjonijiet Uniti kontra l-fabbrikazzjoni u t-traffikar illeċiti fl-armi, il-biċċiet, il-komponenti u l-munizzjon tagħhom, l-Istati Membri ta’ l-Unjoni Ewropea għandhom jappoġġjaw id-definizzjoni ta’ arma tan-nar ibbażata fuq il-kunċett ta’ arma bil-kanna letali li tispara, imfassla biex tispara, jew li tista’ faċilment tinbidel biex tispara xi sparatura, balla jew projettili bl-azzjoni ta’ xi splussiv, imma qed jitħallew barra armi antiki jew mudelli tagħhom. F’dak il-kuntest it-tifsira ta’ arma antika għandha tiġi trattata taħt il-liġijiet domestici imma ma għandhiex tinkludi xi arma tan-nar maħduma wara l-1870.

Artikolu 2

Għall-għanijiet ta’ l-abbozz tal-Protokoll, armi ta’ splużjoni, bħal bombi, granati, rokits, jew missili, ma għandhomx jitqiesu bħala armi tan-nar. Madankollu, għandha ssir disposizzjoni fit-test biex il-fabbrikazzjoni u t-traffikar illeċiti ta’ dawn l-armi jkun kriminalizzat.

Artikolu 3

1. L-Istati Membri jaqblu li aktar konsiderazzjoni ta’ kwalunkwe kwistjoni rigward il-fabbrikazzjoni u t-traffikar illeċiti ta’ splussivi minn kriminali u l-użu tagħhom għall-għanijiet kriminali għandha tistenna r-riżultat ta’ l-istudju li sar mill-grupp ta’ esperti ad hoc identifikat fir-Riżoluzzjoni E/1999/30 ta’ l-Assemblea Generali tan-Nazzjonijiet Uniti u possibbilment l-elaborazzjoni ta’ strument internazzjonali fuq il-fabbrikazzjoni u t-traffikar illeċiti ta’ l-isplussivi mill-Kumitat ad hoc kontra l-kriminalità organizzata lil hinn mill-fruntieri nazzjonali.

2. L-Istati Membri għandhom jappoġġjaw ix-xogħol tal-grupp espert ad hoc tan-Nazzjonijiet Uniti u għandhom ifittxu biex jassiguraw li l-attivitajiet tiegħu jitlestew kemm jista’ jkun malajr.

Artikolu 4

Il-Kunsill għandu jagħmel kull sforz biex jikseb aktar Posizzjonijiet Komuni, kif meħtieġ, b’relazzjoni għall-abbozz tal-Protokoll.

Magħmula fi Brussell, fil-31 ta’ Jannar 2000.

Għall-Kunsill

Il-President

J. Pina Moura

[1] ĠU L 9, tal-15.1.199, pġ. 1.

[2] ĠU L 87, tal-31.3.1999, pġ. 1.

--------------------------------------------------