Id-Direttiva tal-Kummissjoni 1999/58/KE

tas-7 ta' Ġunju 1999

li taddatta l-progress għad-Direttiva tal-Kunsill 79/533/KEE dwar il-mekkaniżmi tat-tqabbid u l-irriversjar għal tratturi bir-roti ghall-agrikoltura jew għall-forestrija

(Test b'relevanza għaż-ŻEE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabilixxi l-Komunità Ewropea,

Wara li kkunsidrat id-Direttiva tal-Kunsill 74/150/KEE ta' l-4 ta' Marzu 1974 dwar l-approssimazzjoni tal-liġijiet ta' l-Istati Membri dwar l-approvazzjoni tat-tip ta' tratturi bir-roti għall-agrikoltura jew għall-forestrija [1], kif l-aħħar emendata mid-Direttiva 97/54/KE tal-Parlament Ewropew u tal-Kunsill [2], u b'mod partikolari Artikolu 11 tagħha,

Wara li kkunsidrat id-Direttiva tal-Kunsill 79/533/KEE tas-17 ta' Mejju 1979 dwar l-approssimazzjoni tal-liġijiet ta' l-Istati Membri li jirrelataw mal-mekkaniżmu tat-tqabbid u t-treġġiegħ lura ta' tratturi bir-roti għall-agrikoltura u għall-forestrija [3], kif l-aħħar emendata bid-Direttiva 97/54/KE, u b'mod partikolari Artikolu 4 tagħha,

(1) Billi, sabiex tittejjeb is-sigurtà, huwa issa meħtieġ li jiġu ċċarati l-ħtiġiet għal dawk il-mekkaniżmi ta' tqabbid;

(2) Billi l-miżuri li għalihom tipprovdi din id-Direttiva huma skond l-opinjoni tal-Kumitat ta' l-Adattament għall-Progress Tekniku stabbilit b'Artikolu 12 tad-Direttiva 74/150/KEE,

ADOTTA DIN ID-DIRETTIVA:

Artikolu 1

Il-parti 3 ta' Anness I li jinsab mad-Direttiva 79/533/KEE hija hawnhekk emendata kif ġej:

1. l-ewwel paragrafu huwa sostitwit b'dan li ġej:

"Il-mekkaniżmu għandu jkun tat-tip slotted-jaw. Il-ftuħ taċ-ċentru tal-pern tal-qfil għandu jkun ta' 60 mm + 0,5/- 1,5 mm u l-fond tal-qfil imkejjel miċ-ċentru tal-pern għandu jkun ta' 62 mm ± 0,5 mm.";

2. id-disinn huwa mħassar

Artikolu 2

1. Mill-1 ta' Lulju 2000, l-Istati Membri ma jistgħux:

- jirrifjutaw li jagħtu approvazzjoni tat-tip KE, li joħorġu d-dokument li għalih jipprovdi t-tielet inċiż ta' Artikolu 10(1) tad-Direttiva 74/150/KEE, jew li jagħtu approvazzjoni tat-tip nazzjonali, dwar xi tip ta' trattur, jew

- iwaqqfu id-dħul fis-servizz ta' trattur,

jekk it-tratturi in kwistjoni jkunu jikkonformaw mal-ħtiġiet tad-Direttiva 79/533/KEE, kif emendata b'din id-Direttiva.

2. Mill-1 ta' Jannar 2001, l-Istati Membri:

- ma jistgħux aktar joħorġu d-dokument li għalih jipprovdi t-tielet indent ta' Artikolu 10(1) ta' Direttiva 74/150/KEE fir-rigward ta' tip ta' trattur li ma jħarisx ir-rekwiżiti ta' d-Direttiva 79/533/KEE, kif emendata minn din id-Direttiva,

- jistgħu jirrifjutaw li jagħtu l-approvazzjoni nazzjonali tat-tip fir-rigward ta' tip ta' trattur li ma jħarisx ir-rekwiżiti ta' d-Direttivi 79/533/KEE, kif emendata minn din id-Direttiva.

Artikolu 3

1. L-Istati Membri għandhom iġibu fis-seħħ il-liġijiet, ir-regolamenti u d-dispożizzjonijiet amministrrattivi meħtieġa għall-konformità ma' din id-Direttiva l-aktar tard sat-30 ta' Ġunju 2000. Għandhom minnufih javżaw b'dan lill-Kummissjoni.

Fejn l-Istati Membri jadottaw dawn id-dispożizzjonijiet, għandu jkun fihom referenza għal din id-Direttiva jew ikunu akumpanjati b'dik ir-referenza fl-okkażjoni tal-pubblikazzjoni uffiċjali tagħhom. L-Istati Membri għandhom jistabbilixxu kif għandha ssir dik ir-referenza.

2. L-Istati Membri għandhom jikkommunikaw lill-Kummissjoni it-test tad-dispożizzjonijiet prinċipali tal-liġi domestika li jaddottaw fil-qasam kopert minn din id-Direttiva.

Artikolu 4

Din id-Direttiva għandha tidħol fis-seħħ fl-20 jum li jiġi wara l-pubblikazzjoni tagħha fil-Ġurnal Uffiċjali tal-Komunitajiet Ewropej.

Artikolu 5

Din id-Direttiva hija indirizzata lil l-Istati Membri.

Magħmula fi Brussel, fis-7 ta' Ġunju 1999.

Għall-Kummissjoni

Martin Bangemann

Membru tal-Kummissjoni

[1] ĠU L 84, tat-28.3.1974, p. 10.

[2] ĠU L 277, ta' l-10.10.1997, p. 24.

[3] ĠU L 145, tat-13.6.1979, p. 20.

--------------------------------------------------