Id-Direttiva Tal-Kunsill

tat-3 ta’ Mejju 1988

li temenda d-Direttiva tal-Kunsill 74/150/KEE ta’ l-4 ta’ Marzu 1974 dwar l-approssimazzjoni tal-liġijiet ta’ l-Istati Membri li għandhom x’jaqsmu ma’ l-approvazzjoni tat-tip ta’ tratturi bir-roti għall-agrikoltura jew għall-foresterija

(88/297/KEE)

IL-KUNSILL TAL-KOMUNITAJIET EWROPEJ,

Wara li kkunsidra t-Trattat li jwaqqaf il-Komunità Ekonomika Ewropea, u b’mod partikolari l-Artikolu 100A tiegħu,

Wara li kkunsidra l-proposta mill-Kummissjoni [1],

B’kooperazzjoni mal-Parlament Ewropew [2],

Wara li kkunsidra l-opinjoni tal-Kumitat Ekonomiku u Soċjali [3],

Billi huwa importanti li jiġu adottati miżuri bil-għan li jiġi stabbilit progressivament is-suq intern matul perjodu li jagħlaq fil-31 ta’ Diċembru 1992; billi s-suq intern għandu jkun fih żona mingħajr fruntieri interni li fiha l-moviment liberu ta’ merkanzija, persuni, servizzi u kapital jiġi żgurat;

Billi l-Anness mad-Direttiva 74/150/KEE [4], kif l-aħħar emendat bid-Direttiva 82/890/KEE [5], fih lista tal-partijiet jew il-karatteristiċi bl-indikazzjoni "SD", li tfisser li Direttivi tal-Komunità kienu jew għandhom jiġu adottati għal dawk il-partijiet jew il-karatteristiċi; billi sar żejjed li jiġu adottati r-regoli Komunitarji għal xi wħud minn dawk il-partijiet jew il-karatteristiċi billi issa dawn qed jintużaw anqas u anqas ta’ spiss fil-manifattura tat-tratturi jew inbidlu b’apparati oħra li issa saru obbligatorji;

Billi, fost ir-regoli tal-Komunità li jiggwidaw l-għoti ta’ l-approvazzjoni tat-tip KEE dwar it-tratturi, dawk li jikkonċernaw il-partijiet jew il-karatteristiċi in kwistjoni jistgħu jinbidlu bl-ispeċifika li dawn jikkonformaw mal-partikolaritajiet u t-tagħrif provdut mill-manifattur,

ADDOTTA DIN ID-DIRETTIVA:

L-Artikolu 1

Fl-Anness II għad-Direttiva 74/150/KEE l-abbrevjazzjoni "SD" li tidher ħdejn l-artikoli 7.3.4, 7.5 u 7.6.3 qed tinbidel bl-abbrevjazzjoni "CONF".

L-Artikolu 2

1. L-Istati Membri għandhom idaħħlu fis-seħħ id-dispożizzjonijiet meħtieġa biex jikkonformaw ma’ din id-Direttiva mhux aktar tard mill-31 ta’ Diċembru 1988. Dawn għandhom minnufih javżaw lill-Kummissjoni bihom.

2. L-Istati Membri għandhom jiżguraw li t-test tad-dispożizzjonijiet prinċipali tal-liġi nazzjonali li jadottaw fil-qasam kopert minn din id-Direttiva jiġu kkomunikati lill-Kummissjoni.

L-Artikolu 3

Din id-Direttiva hija indirizzata lill-Istati Membri.

Magħmula fi Brussel, fit-3 ta’ Mejju 1988.

Għall-Kunsill

Il-President

M. Bangemann

[1] ĠU C 88, tat-3.4.1987, p. 10.

[2] ĠU C 156, tal-15.6.1987, p. 190, u ĠU C 94, tal-11.4.1988, p. 66.

[3] ĠU C 180, tat-8.7.1987, p. 15.

[4] ĠU L 84, tat-28.3.1974, p. 10.

[5] ĠU L 378, tal-31.12.1982, p. 45.

--------------------------------------------------