Id-Direttiva tal-Kunsill

ta’ l-24 ta’ Lulju 1979

li temenda d-Direttiva 74/150/KEE dwar l-approssimazzjoni tal-liġijiet ta’ l-Istati Membri rigward l-approvazzjoni tat-tip ta’ tratturi bir-roti għall-agrikoltura jew għall-foresterija

(74/150/KEE)

IL-KUNSILL TAL-KOMUNITAJIET EWROPEJ,

Wara li kkunsidra t-Trattat li jistabbilixxi l-Komunità Ekonomika Ewropea, u b’mod partikolari l-Artikolu 100 tiegħu,

Wara li kkunsidra l-proposta mill-Kummissjoni,

Wara li kkunsidra l-opinjoni tal-Parlament Ewropew [1],

Wara li kkunsidra l-opinjoni tal-Kumitat Ekonomiku u Soċjali [2],

Billi ċerti sistemi jew partijiet ta’ tratturi li jiffurmaw entità teknika separata huma diġà mqiegħda fis-suq kemm separatament kif ukoll wara li jiġu mmuntati fuq trattur; billi, safejn huwa possibbli li jiġi verifikat dawk is-sistemi jew il-partijiet qabel ma jiġu mmuntati fuq trattur, il-moviment liberu tagħhom jista’ jiġi faċilitat bl-introduzzjoni ta’ approvazzjoni tat-tip KEE anke għal dawn l-entitajiet tekniċi separati;

Billi hija għalhekk ħaġa mixtieqa li d-Direttiva tal-Kunsill 74/150/KEE ta’ l-4 ta’ Marzu 1974 dwar l-approssimazzjoni tal-liġijiet ta’ l-Istati Membri dwar l-approvazzjoni tat-tip ta’ tratturi bir-roti għall-agrikoltura jew għall-forestrija [3] għandhom jiġu supplimentati mingħajr dewmien b’disposizzjonijiet li jintroduċu dik l-approvazzjoni tat-tip;

Billi l-approvazzjoni tat-tip KEE ta’ entitajiet tekniċi separati li għandhom jiġu mmuntati fuq tratturi tissimplifika l-proċedura ta’ l-approvazzjoni tat-tip tat-tratturi billi tevita r-repetizzjoni ta’ ċerti verifiki matul l-approvazzjoni tat-tip; billi għandu jkun possibbli, meta tingħata l-approvazzjoni tat-tip KEE għall-entitajiet tekniċi separati, li jitniżżlu restrizzjonijiet għall-użu tagħhom u/jew kondizzjonijiet għall-iffittjar tagħhom;

Billi għandu dejjem jibqa’ possibbli li jiġu adattati d-Direttivi separati dwar il-progress tekniku fil-produzzjoni ta’ l-entitajiet tekniċi separati; billi l-proċedura stabbilita fl-Artikolu 13 tad-Direttiva tal-Kunsill 74/150/KEE hija approprjata għal dan il-għan;

Billi l-ħtiġiet tekniċi relatati ma’l-ispazju li fih jopera x-xufier u-twieqi tat-tratturi ivarjaw minn Stat Membru għal ieħor; billi huwa għalhekk meħtieġ li l-Istati Membri kollha jadottaw l-istess ħtiġiet mingħajr dewmien jew b’żieda mar-regoli eżistenti tagħhom jew minflokhom;

Billi l-verifiki dwar il-konformità ma’ dawn il-ħtiġiet għandhom isiru taħt il-proċedura tat-tip ta’ l-approvazzjoni KEE għal kull tip ta’ trattur kif previst mid-Direttiva 74/150/KEE; billi huwa għalhekk meħtieġ li din id-Direttiva tiġi supplimentata billi jiġu inkorporati r-referenzi meħtieġa fl-Anness I (Eżemplari ta’dokument tat-tagħrif) u l-Anness II (Eżemplari taċ-ċertifikat ta’ l-approvazzjoni tat-tip KEE),

ADDOTTA DIN ID-DIRETTIVA:

Artikolu 1

Id-Direttiva tal-Kunsill 74/150/KEE qed tiġi emendata kif ġej:

(a) L-Artikolu li ġej għandu jiżdied wara l-Artikolu 9:

"Artikolu 9a

1. Meta d-Direttivi separati jagħmlu disposizzjoni espressa biex isir dan, it-tip ta’ l-approvazzjoni KEE tista’ tingħata wkoll lit-tipi ta’ sistemi jew partijiet ta’ tratturi li jagħmlu parti minn entità teknika separata.

2. Meta l-entità teknika separata li għandha tiġi approvata taqdi l-funzjoni tagħha jew toffri xi fattur speċifiku biss flimkien ma’ komponenti oħra tat-trattur u għal din ir-raġuni l-konformità ma’ ħtieġa waħda jew aktar tkun tista’ tiġi verifikata biss meta l-entità teknika separata li għandha tiġi approvata topera flimkien ma’ komponenti oħra tat-trattur, sew jekk reali kif ukoll jekk simulati, l-ambitu ta’ l-approvazzjoni tat-tip KEE ta’ l-entità teknika separata għandu għalhekk jiġi ristrett. Iċ-ċertifikat ta’ l-approvazzjoni tat-tip KEE għal entità teknika separata għandu mbagħad jinkludi xi restrizzjonijiet dwar l-użu tagħha u għandu jindika xi kondizzjonijiet għall-immuntar tagħha. L-osservanza ta’ dawn ir-restrizzjonijiet u l-kondizzjonijiet għandha tiġi verifikata fl-istess żmien ta’ l-approvazzjoni tat-tip KEE għat-trattur.

3. L-Artikoli minn 3 sa 9 u 14 għandhom jgħoddu b’analoġija.

Madankollu, d-detentur ta’ approvazzjoni tat-tip KEE għal entità teknika separata mogħtija skond dan l-Artikolu għandu jkun obbligat mhux biss li jimla ċ-ċertifikat previst fl-Artikolu 5(2), iżda wkoll li jwaħħal ma’ kull entità manifatturata b’konformità mat-tip approvat l-isem kummerċjali jew il-marka, it-tip u, jekk id-Diretttiva separata hekk tipprovdi, in-numru ta’ l-approvazzjoni tat-tip."

(b) Il-paragrafu li ġej għandu jiżdied ma’ l-Artikolu 11:

"Din il-proċedura għandha tgħodd ukoll bil-għan li jiġu introdotti d-dispożizzjonijiet dwar l-approvazzjoni tat-tip KEE għal entitajiet tekniċi separati fid-Direttivi separati."

(c) Is-sezzjonijiet li ġejjin għandhom jiżdiedu ma’l-Anness I (Eżemplari tad-dokument tat-tagħrif)

- "8.4.4. L-ispazju li fih jopera x-xufier",

- "8.4.5. It-twieqi".

(d) Is-sezzjonijiet li ġejjin għandhom jiżdiedu ma’l-Anness II (Eżemplari taċ-ċertifikat ta’ l-approvazzjoni tat-tip KEE)

- "7.4.4. L- SD ta’ l-ispazju li fih jopera x-xufier",

- "7.4.5. L-SD tat-twieqi".

Artikolu 2

1. L-Istati Membri għandhom idaħħlu fis-seħħ id-disposizzjonijiet meħtieġa għall-konformità ma’ din id-Direttiva fi żmien tmintax-il xaħar min-notifika tagħha u għandhom minnufih javżaw lill-Kummissjoni bihom.

2. L-Istati Membri għandhom jiżguraw li t-test tad-disposizzjonijiet prinċipali tal-liġi nazzjonali li jadottaw fil-kamp kopert minn din id-Direttiva jiġu komunikati lill-Kummissjoni.

Artikolu 3

Din id-Direttiva hija indirizzata lill-Istati Membri.

Magħmula fi Brussel, fl-24 ta’ Lulju 1979.

Għall-Kunsill

Il-President

M. O’Kennedy

[1] ĠU C 127, tal-21.5.1979, p. 80.

[2] L-Opinjoni mogħtija fit-22 u 23 ta’ Mejju 1979 (għadha mhix ippubblikata fil-Ġurnal Uffiċjali).

[3] ĠU L 84, 28.3.1974, p. 10.

--------------------------------------------------