Appell ippreżentat fl-1 ta’ Frar 2023 minn Validity Foundation – Mental Disability Advocacy Centre mid-digriet mogħti mill-Qorti Ġenerali (Is-Seba’ Awla) fit-22 ta’ Novembru 2022 fil-Kawża T-640/20, Validity vs Il-Kummissjoni

(Kawża C-51/23 P)

(2023/C 189/12)

Lingwa tal-kawża: l-Ingliż

Partijiet

Appellant: Validity Foundation – Mental Disability Advocacy Centre (rappreżentanti: B. Van Vooren, advocaat, u M.R. Oyarzabal Arigita, abogada)

Parti oħra fil-proċedura: Il-Kummissjoni Ewropea

Talbiet

L-appellanti titlob li l-Qorti tal-Ġustizzja jogħġobha:

—	tiddikjara l-appell ammissibbli u fondat;

—	tannulla d-digriet tal-Qorti Ġenerali tat-22 ta’ Novembru 2022 fil-Kawża T-640/20, Validity vs Il-Kummissjoni;

—	tannulla d-Deċiżjoni tal-Kummissjoni C(2020) 5540 final tas-6 ta’ Awwissu 2020 u Deċiżjoni C(2021) 2834 final tad-19 ta’ April 2021; u

—	tikkundanna lill-Kummissjoni Ewropea għall-ispejjeż; jew

—	sussidjarjament, tirrinvija l-kawża quddiem il-Qorti Ġenerali għal deċiżjoni fuq il-mertu u tirriżerva l-ispejjeż.

Aggravji u argumenti prinċipali

Fl-ewwel aggravju tagħha, l-appellanti tikkontesta l-konstatazzjoni tal-Qorti Ġenerali li ma hemmx riskju li l-Kummissjoni tikser fil-ġejjieni l-Artikolu 4(3) tar-Regolament Nru 1049/2001 (iktar ’il quddiem ir-“Regolament dwar it-Trasparenza”) minħabba li:

i.	il-bażi legali “klima ta’ fiduċja reċiproka” ma tikkostitwixxix preżunzjoni ġenerali ta’ kunfidenzjalità; u

ii.	ma hemm l-ebda riskju li l-Kummissjoni terġa’ tinvoka bażi legali vaga, bħalma hija “klima ta’ fiduċja reċiproka”, f’talbiet fil-ġejjieni għal aċċess għal dokumenti.

Fit-tieni aggravju tagħha, l-appellanti ssostni li l-Qorti Ġenerali wettqet żball ta’ liġi meta kkonkludiet li ma hemm l-ebda riskju li jerġa’ jkun hemm ksur tal-prinċipji ta’ trasparenza u ta’ amministrazzjoni tajba, u li jerġa’ jsir ksur procedurali tar-Regolament dwar it-Trasparenza li seħħew fil-proċedura li waslet għal dawn il-proċedimenti.