TRADUZZJONI

FTEHIM

bejn l-Organizzazzjoni Konġunta għall-Kooperazzjoni fl-Armamenti u l-Unjoni Ewropea dwar il-protezzjoni tal-informazzjoni klassifikata

L-Organizzazzjoni Konġunta għall-Kooperazzjoni fl-Armamenti, minn hawn ’il quddiem imsejħa "OCCAR",

L-Unjoni Ewropea, minn hawn ’il quddiem imsejħa "l-UE",

Minn hawn ’il quddiem imsejħin "il-Partijiet",

WAQT LI JQISU LI l-Partijiet jaqblu li għandhom jiġu żviluppati konsultazzjonijiet u kooperazzjoni bejniethom dwar kwistjonijiet ta’ interess komuni relatati mas-sigurtà;

WAQT LI JIRRIKONOXXU li konsultazzjoni sħiħa u effikaċi tista’ teħtieġ aċċess għal informazzjoni klassifikata tal-OCCAR u tal-UE, kif ukoll l-iskambju ta’ informazzjoni klassifikata bejn il-Partijiet;

KONXJI LI tali aċċess għal informazzjoni klassifikata u l-iskambju tagħha jeħtieġu miżuri ta’ sigurtà adatti;

WAQT LI JQISU LI fit-18 ta’ Mejju 2009 l-Kunsill approva r-rakkomandazzjoni tal-Bord ta’ Tmexxija tal-Aġenzija Ewropea għad-Difiża biex il-ħidma dwar l-istabbiliment ta’ Ftehim ta’ Sigurtà bejn l-UE u l-OCCAR titmexxa ’l quddiem, bl-objettiv li din tkun disponibbli fil-ħin għall-approvazzjoni tal-Arranġament Amministrattiv bejn l-EDA u l-OCCAR;

WAQT LI JINNOTAW LI l-Bord tas-Sorveljanti tal-OCCAR awtorizza lid-Direttur tal-Amministrazzjoni Esekuttiva (AE) tal-OCCAR sabiex jikkonkludi tali Ftehim dwar is-Sigurtà;

WAQT LI JINNOTAW li fil-15 ta’ Ġunju 2009 l-Kunsill awtorizza lill-Presidenza biex tiftaħ negozjati mal-OCCAR sabiex jiġi konkluż ftehim dwar is-sigurtà tal-informazzjoni,

FTIEHMU KIF ĠEJ:

Artikolu 1

Il-Ftehim bejn l-OCCAR u l-UE dwar il-protezzjoni tal-informazzjoni klassifikata (minn hawn ’il quddiem il-“Ftehim”) għandu japplika għal informazzjoni klassifikata fi kwalunkwe forma kemm jekk ipprovduta mill-Partijiet kif ukoll jekk skambjata bejniethom.

Artikolu 2

Għall-finijiet ta’ dan il-Ftehim, “informazzjoni klassifikata” għandha tfisser kwalunkwe informazzjoni, (jiġifieri, tagħrif li jista’ jiġi komunikat fi kwalunkwe forma) dokument jew materjal li ġie ddeterminat minn kwalunkwe waħda mill-Partijiet bħala li jeħtieġ protezzjoni kontra żvelar mhux awtorizzat li jista’ jikkawża gradi differenti ta’ dannu, ħsara jew preġudizzju lill-interessi tal-OCCAR, jew tal-UE jew wieħed jew aktar mill-Istati Membri rispettivi tagħhom, u li ġie indikat bħala tali permezz ta’ klassifikazzjoni tas-sigurtà.

Artikolu 3

L-istituzzjonijiet u l-entitajiet tal-UE li għalihom japplika dan il-Ftehim għandhom ikunu: il-Kunsill Ewropew, il-Kunsill tal-Unjoni Ewropea (minn hawn ’il quddiem “il-Kunsill”), is-Segretarjat Ġenerali tal-Kunsill, ir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà, il-Kummissjoni Ewropea u s-Servizz Ewropew għall-Azzjoni Esterna (minn hawn ’il quddiem “is-SEAE”). Għall-finijiet ta’ dan il-Ftehim, dawn l-istituzzjonijiet u l-entitajiet għandhom jissejħu "l-UE".

Artikolu 4

1. Informazzjoni klassifikata tista’ tiġi żvelata jew rilaxxata minn Parti waħda (il-Parti provvedenti) lill-Parti l-oħra (il-Parti riċeventi) skont il-prinċipju tal-kontroll tal-oriġinatur.

2. Fl-implimentazzjoni tal-paragrafu 1, ma għandu jkun possibbli l-ebda rilaxx ġeneriku dment li ma jkunux ġew maqbula proċeduri bejn il-Partijiet rigward ċerti kategoriji ta’ informazzjoni, rilevanti għall-ħtiġijiet operattivi tagħhom.

Artikolu 5

Kull waħda mill-Partijiet, u l-entitajiet tagħha kif definiti fl-Artikolu 3 ta’ dan il-Ftehim, għandhom jiżguraw li jkollhom stabbiliti sistema ta’ sigurtà u miżuri ta’ sigurtà, ibbażati fuq il-prinċipji bażiċi u l-istandards minimi ta’ sigurtà stabbiliti fir-regoli u r-regolamenti tas-sigurtà rispettivi tagħha, u riflessi fl-arranġamenti li għandhom jiġu stabbiliti skont l-Artikolu 12, sabiex ikun żgurat li jiġi applikat livell ekwivalenti ta’ protezzjoni għal informazzjoni klassifikata pprovduta jew skambjata taħt dan il-Ftehim.

Artikolu 6

1. Informazzjoni klassifikata għandha tkun immarkata kif ġej:

(a)	Għall-OCCAR, l-informazzjoni klassifikata għandha tkun immarkata OCCAR SECRET, OCCAR CONFIDENTIAL jew OCCAR RESTRICTED.

(b)	Għall-UE, l-informazzjoni klassifikata għandha tkun immarkata SECRET UE/EU SECRET, CONFIDENTIEL UE/EU CONFIDENTIAL jew RESTREINT UE/EU RESTRICTED.

2. Il-klassifikazzjonijiet ta’ sigurtà korrispondenti huma:

Fl-OCCAR	Fl-Unjoni Ewropea
OCCAR SECRET	SECRET UE/EU SECRET
OCCAR CONFIDENTIAL	CONFIDENTIEL UE/EU CONFIDENTIAL
OCCAR RESTRICTED	RESTREINT UE/EU RESTRICTED

Artikolu 7

1. Kull Parti għandha:

(a)	tipproteġi u tissalvagwardja l-informazzjoni klassifikata pprovduta jew skambjata mill-Parti l-oħra taħt dan il-Ftehim minn żvelar, telf jew sitwazzjoni kompromettenti mhux awtorizzati;

(b)

tiżgura li l-informazzjoni klassifikata pprovduta jew skambjata taħt dan il-Ftehim iżżomm il-marka tal-klassifikazzjoni ta’ sigurtà mogħtija lilha mill-Parti provvedenti. Il-Parti riċeventi għandha tipproteġi u tissalvagwardja l-informazzjoni klassifikata sa livell mhux inqas strett mid-dispożizzjonijiet stabbiliti fir-regoli u r-regolamenti tas-sigurtà tagħha stess għal informazzjoni jew materjal li jkollhom klassifikazzjoni ta’ sigurtà ekwivalenti, kif speċifikat fl-Artikolu 6;

(c)	tiżgura li l-informazzjoni klassifikata riċevuta mill-Parti l-oħra ma jitnaqqasilhiex il-grad jew ma tiġix deklassifikata mingħajr il-kunsens bil-miktub minn qabel ta’ dik il-Parti;

(d)	ma tużax tali informazzjoni klassifikata għal għanijiet li mhumiex dawk stabbiliti mill-oriġinatur jew dawk li għalihom tiġi pprovduta jew skambjata l-informazzjoni;

(e)

ma tippermettix l-aċċess għal informazzjoni klassifikata lil individwi sakemm dawn ikollhom ħtieġa ta’ tagħrif sabiex iwettqu d-dmirijiet uffiċjali tagħhom u fejn l-aċċess huwa meħtieġ għal CONFIDENTIEL UE/EU CONFIDENTIAL jew OCCAR CONFIDENTIAL jew għal SECRET UE/EU SECRET jew OCCAR SECRET, ikunu ngħataw approvazzjoni tas-sigurtà skont ir-regoli u r-regolamenti tas-sigurtà tal-Parti riċeventi; u

(f)	tiżgura li l-individwi kollha li jkollhom aċċess għal informazzjoni klassifikata jkunu informati dwar ir-responsabbiltajiet tagħhom li jipproteġu l-informazzjoni skont ir-regoli u r-regolamenti tas-sigurtà applikabbli.

2. L-UE ma għandhiex tiżvela informazzjoni klassifikata pprovduta mill-OCCAR taħt dan il-Ftehim lil partijiet terzi, jew lil kwalunkwe istituzzjoni jew entità tal-UE mhux imsemmija fl-Artikolu 3, mingħajr il-kunsens bil-miktub minn qabel tal-OCCAR.

L-OCCAR ma għandhiex tiżvela informazzjoni klassifikata pprovduta mill-UE taħt dan il-Ftehim lil partijiet terzi mingħajr il-kunsens bil-miktub minn qabel tal-UE. Tali kunsens għandu jingħata mill-Kunsill, filwaqt li jaġixxi b’mod unanimu.

Artikolu 8

1. Il-Partijiet għandhom jiżguraw li l-persuni kollha li, fit-twettiq tad-dmirijiet uffiċjali tagħhom, jeħtieġu aċċess, jew li d-dmirijiet jew funzjonijiet tagħhom jistgħu jagħtuhom aċċess, għal informazzjoni klassifikata provduta jew skambjata taħt dan il-Ftehim ikunu ngħataw l-approvazzjoni adatta tas-sigurtà qabel ma jingħataw aċċess għal informazzjoni klassifikata CONFIDENTIEL UE/EU CONFIDENTIAL jew OCCAR CONFIDENTIAL jew għal SECRET UE/EU SECRET jew OCCAR SECRET.

2. Il-proċeduri għall-approvazzjoni tas-sigurtà għandhom jitfasslu biex jiġi determinat jekk individwu jistax, b’kont meħud tal-lealtà, fidatezza u affidabbiltà tiegħu, ikollu aċċess għal informazzjoni klassifikata.

Artikolu 9

Il-Partijiet għandhom jipprovdu assistenza reċiproka fir-rigward tas-sigurtà ta’ informazzjoni klassifikata pprovduta jew skambjata taħt dan il-Ftehim. Għandhom isiru konsultazzjonijiet reċiproċi ta’ sigurtà u żjarat ta’ valutazzjoni mill-awtoritajiet imsemmija fl-Artikolu 12 biex tiġi valutata l-effikaċja tal-arranġamenti ta’ sigurtà fil-qasam tar-responsabbiltà rispettiva tagħhom għall-protezzjoni ta’ tali informazzjoni klassifikata.

Artikolu 10

1. Għall-finijiet ta’ dan il-Ftehim:

(a)	Fir-rigward tal-UE, il-korrispondenza kollha għandha tgħaddi mingħand l-Uffiċjal Kap tar-Reġistru tal-Kunsill u għandha tintbagħat minnu lill-Istati Membri u lill-istituzzjonijiet jew lill-entitajiet imsemmija fl-Artikolu 3, soġġett għall-paragrafu 2.

(b)	Fir-rigward tal-OCCAR, il-korrispondenza kollha għandha tintbagħat lill-Uffiċjal tal-Kontroll tar-Reġistru tal-OCCAR-AE u, jekk ikun meħtieġ, tintbagħat minnu lir-Reġistri Klassifikati rilevanti tal-OCCAR-AE, soġġett għall-paragrafu 2 ta’ dan l-Artikolu.

2. B’mod eċċezzjonali, il-korrispondenza minn Parti waħda li tkun aċċessibbli biss għal uffiċjali, organi jew servizzi kompetenti speċifiċi ta’ dik il-Parti tista’, għal raġunijiet operattivi, tiġi indirizzata biss lil, u tkun aċċessibbli biss għal uffiċjali, organi jew servizzi kompetenti speċifiċi tal-Parti l-oħra indikati b’mod speċifiku mill-Parti provvedenti bħala riċevituri, b’kont meħud tal-kompetenzi tagħhom u skont il-prinċipju ta’ ħtieġa ta’ tagħrif.

Sa fejn hija kkonċernata l-Unjoni Ewropea, tali korrispondenza għandha tiġi trasmessa permezz tal-Uffiċjal Kap tar-Reġistru tal-Kunsill, l-Uffiċjal Kap tar-Reġistru tal-Kummissjoni Ewropea jew l-Uffiċjal Kap tar-Reġistru tas-SEAE, skont il-każ.

Sa fejn hija kkonċernata l-OCCAR, tali korrispondenza għandha tkun trasmessa permezz tal-Uffiċjal ta’ Kontroll tar-Reġistru tal-OCCAR-AE.

3. L-informazzjoni klassifikata kollha għandha tiġi trasmessa permezz ta’ kanali miftiehmin mill-awtoritajiet tas-sigurtà tal-Partijiet.

4. L-informazzjoni klassifikata trasmessa b’mezzi elettroniċi għandha tkun kriptata f’konformità mar-rekwiżiti tal-Parti provvedenti, kif indikat fir-regoli u r-regolamenti tas-sigurtà tagħha. Ir-rekwiżiti tal-Parti provvedenti għandhom jiġu sodisfatti meta informazzjoni klassifikata tkun qed tiġi trasmessa, maħżuna u pproċessata fin-netwerks interni tal-Partijiet.

Artikolu 11

Id-Direttur tal-OCCAR-EA għandu jissorvelja l-implimentazzjoni ta’ dan il-Ftehim mill-OCCAR. Ir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà, il-Membru tal-Kummissjoni Ewropea responsabbli għall-materji ta’ sigurtà u s-Segretarjat Ġenerali tal-Kunsill għandhom jissorveljaw l-implimentazzjoni ta’ dan il-Ftehim mill-UE.

Artikolu 12

1. Sabiex dan il-Ftehim jiġi implimentat, għandhom jiġu stabbiliti arranġamenti ta’ sigurtà bejn l-erba’ awtoritajiet indikati fil-paragrafi 2, 3, 4 u 5 sabiex jiġu deskritti l-istandards għat-trasmissjoni, il-protezzjoni reċiproka ta’ informazzjoni klassifikata u ż-żjajjar taħt dan il-Ftehim.

2. It-Taqsima tas-Sigurtà tal-OCCAR-AE, taħt id-direzzjoni u f’isem id-Direttur tal-OCCAR-AE, li jaġixxi għall-OCCAR u taħt l-awtorità tagħha, għandha tfassal l-arranġamenti tas-sigurtà għall-protezzjoni u s-salvagwardja tal-informazzjoni klassifikata pprovduta lill-OCCAR taħt dan il-Ftehim f’konformità mar-regoli u r-regolamenti tas-sigurtà tal-OCCAR.

3. L-Uffiċċju tas-Sigurtà tas-Segretarjat Ġenerali tal-Kunsill, taħt id-direzzjoni u għan-nom tas-Segretarju-Ġenerali tal-Kunsill, li jaġixxi f’isem il-Kunsill u taħt l-awtorità tiegħu, għandu jfassal l-arranġamenti ta’ sigurtà għall-protezzjoni u s-salvagwardja ta’ informazzjoni klassifikata pprovduta lill-UE skont dan il-Ftehim f’konformità mar-regoli ta’ sigurtà tal-Kunsill.

4. Id-Direttorat tas-Sigurtà tal-Kummissjoni Ewropea, li jaġixxi taħt l-awtorità tal-Membru tal-Kummissjoni responsabbli għal materji ta’ sigurtà, għandu jfassal l-arranġamenti ta’ sigurtà għall-protezzjoni ta’ informazzjoni klassifikata pprovduta taħt dan il-Ftehim fil-Kummissjoni Ewropea u fil-bini tagħha f’konformità mad-dispożizzjonijiet ta’ sigurtà tal-Kummissjoni.

5. Id-Direttorat għas-Sigurtà tas-Servizz Ewropew għall-Azzjoni Esterna, filwaqt li jaġixxi taħt l-awtorità tar-Rappreżentant Għoli tal-Unjoni għall-Affarijiet Barranin u l-Politika ta’ Sigurtà, għandu jfassal arranġamenti ta’ sigurtà għall-protezzjoni ta’ informazzjoni klassifikata previsti taħt dan il-Ftehim fi ħdan is-SEAE u l-bini tiegħu f’konformità mar-regoli ta’ sigurtà għas-SEAE.

6. Għall-UE, l-arranġamenti ta’ sigurtà msemmijin fil-paragrafu 1 għandhom ikunu soġġetti għall-approvazzjoni mill-Kumitat tas-Sigurtà tal-Kunsill.

7. Għall-OCCAR, l-arranġamenti ta’ sigurtà msemmijin fil-paragrafu 1 għandhom ikunu soġġetti għall-approvazzjoni mill-Kumitat tas-Sigurtà tal-OCCAR.

Artikolu 13

F’każ ta’ ksur tas-sigurtà li jirriżulta f’telf jew f’sitwazzjoni kompromettenti ta’ informazzjoni klassifikata riċevuta mill-Parti provvedenti, jew f’każ ta’ suspett li tali informazzjoni klassifikata ġiet żvelata lil persuni mhux awtorizzati, il-Parti riċeventi għandha tinforma immedjatament lill-Parti provvedenti.

Għandha titwettaq investigazzjoni immedjata mill-Parti riċeventi (b’assistenza mill-Parti provvedenti jekk meħtieġ) f’konformità mar-regoli u r-regolamenti tas-sigurtà tagħha għall-protezzjoni ta’ informazzjoni klassifikata. Il-Parti riċeventi għandha tinforma lill-Parti provvedenti dwar iċ-ċirkostanzi, il-miżuri adottati, u r-riżultat tal-investigazzjoni malajr kemm jista’ jkun u dwar l-azzjoni korrettiva li ttieħdet biex ikun evitat li jerġa’ jiġri hekk. L-awtoritajiet imsemmijin fl-Artikolu 12 jistgħu jistabbilixxu proċeduri għal dak il-għan.

Artikolu 14

Kull Parti għandha tassumi l-ispejjeż tagħha stess fl-implimentazzjoni ta’ dan il-Ftehim.

Artikolu 15

Qabel ma tiġi pprovduta jew skambjata informazzjoni klassifikata bejn il-Partijiet taħt dan il-Ftehim, l-awtoritajiet tas-sigurtà responsabbli msemmijin fl-Artikolu 12 għandhom jaqblu li l-Parti riċeventi tkun tista’ tipproteġi u tissalvagwardja l-informazzjoni b’mod konsistenti mal-arranġamenti li għandhom jiġu stabbiliti skont dak l-Artikolu.

Artikolu 16

Dan il-Ftehim m’għandux iżomm lill-Partijiet milli jikkonkludu Ftehimiet oħra relatati mal-għoti jew skambju ta’ informazzjoni klassifikata bil-kondizzjoni li ma jkunux f’konflitt mad-disposizzjonijiet ta’ dan il-Ftehim.

Artikolu 17

Kwalunkwe disputa bejn l-OCCAR u l-UE li tirriżulta mill-interpretazzjoni jew l-applikazzjoni ta’ dan il-Ftehim għandha tiġi indirizzata b’negozjar bejn il-Partijiet. Sa meta tiġi riżolta kwalunkwe disputa, il-Partijiet għandhom ikomplu jissodisfaw ir-responsabbiltajiet kollha tagħhom taħt dan il-Ftehim.

Artikolu 18

1. Dan il-Ftehim għandu jidħol fis-seħħ fid-data tal-iffirmar mill-Partijiet.

2. Kull Parti għandha tinnotifika lill-Parti l-oħra bi kwalunkwe tibdil fir-regoli u r-regolamenti tagħha li jista’ jaffettwa l-protezzjoni tal-informazzjoni klassifikata msemmija f’dan il-Ftehim.

3. Dan il-Ftehim jista’ jiġi rivedut sabiex jiġu kkunsidrati emendi possibbli fuq talba ta’ kwalunkwe Parti. Huwa għandu jiġi rivedut f’każ li kwalunkwe Stat mhux membru tal-UE jsir membru tal-OCCAR.

4. Kwalunkwe emenda għal dan il-Ftehim għandha ssir biss bil-miktub u għandha tkun iffirmata minn kull waħda mill-Partijiet għal dan il-Ftehim.

Artikolu 19

Dan il-Ftehim huwa konkluż għal perijodu ta’ żmien indefinit. Jista’ jiġi ddenunzjat minn Parti waħda permezz ta’ notifika ta’ denunzja bil-miktub mogħtija lill-Parti l-oħra. Tali denunzja għandha ssir effettiva sitt xhur wara li l-Parti l-oħra tkun irċeviet in-notifika, iżda m’għandhiex taffettwa l-obbligi li jkunu diġà kuntrattati taħt id-dispożizzjonijiet ta’ dan il-Ftehim. B’mod partikolari, kull informazzjoni klassifikata pprovduta jew skambjata skont dan il-Ftehim għandha tibqa’ tiġi protetta skont id-dispożizzjonijiet stabbiliti fih.

B’xiehda ta’ dan is-sottoskritti, debitament awtorizzati rispettivament, iffirmaw dan il-Ftehim.

Magħmul fi Brussell, dan is-sebgħa u għoxrin jum ta’ Lulju, elfejn u tnax f’żewġ eżemplari, kull waħda bl-Ingliż.

Għall-OCCAR

Għall-Unjoni Ewropea