(1)

Ir-Regolament tal-Kummissjoni (KE) Nru 2014/2005 tad-9 ta’ Diċembru 2005 dwar il-liċenzji taħt l-arranġamenti għall-importazzjoni tal-banana lejn il-Komunità fir-rigward tal-banana li tkun tqiegħdet f’ċirkulazzjoni ħielsa bir-rata tad-dazju tat-tariffa doganali komuni (2), mill-1 ta’ Jannar 2012 huwa mħassar permezz tar-Regolament ta’ Implimentazzjoni tal-Kummissjoni (UE) Nru 1287/2011 (3). Fil-punt (a) tal-Artikolu 2(1) tar-Regolament (KE) Nru 2014/2005 hemm id-dispożizzjonijiet dwar in-notifiki tal-prezzijiet bl-ingrossa għall-banana s-safra.

(2)

Sabiex is-suq tal-banana jkompli jiġi mmonitorjat, huwa xieraq li jiġu pprovduti n-notifiki tal-Istati Membri lill-Kummissjoni rigward il-prezzijiet bl-ingrossa tal-banana s-safra li taqa’ fil-kodiċi tan-NM 0803 90 10 , skont ir-Regolament tal-Kummissjoni (KE) Nru 792/2009 tal-31 ta’ Awwissu 2009 li jistipula regoli dettaljati għan-notifiki tal-Istati Membri lill-Kummissjoni dwar informazzjoni u dokumenti fl-implimentazzjoni tal-organizzazzjoni komuni tas-swieq, l-iskema tal-pagamenti diretti, il-promozzjoni tal-prodotti agrikoli u s-sistemi applikabbli għar-reġjuni l-iktar imbiegħda u l-Gżejjer iż-żgħar tal-Eġew (4).

(3)

Sabiex tkun żgurata l-konsistenza mas-settur tal-frott u l-ħaxix, huwa xieraq li jiġu rreġistrati l-prezzijiet bl-ingrossa tal-banana s-safra fuq is-swieq rappreżentattivi elenkati fl-Anness XVII għar-Regolament tal-Kummissjoni (UE) Nru 543/2011 tas-7 ta’ Ġunju 2011 li jistabbilixxi regoli dettaljati għall-applikazzjoni tar-Regolament tal-Kunsill (KE) Nru 1234/2007 għas-setturi tal-frott u l-ħaxix u tal-frott u tal-ħaxix ipproċessat (5).

(4)

Il-miżuri stipulati f’dan ir-Regolament huma skont l-opinjoni tal-Kumitat ta’ Ġestjoni għall-Organizzazzjoni Komuni tas-Swieq Agrikoli,