(1)

Il-Bank Ewropew tal-Investiment (BEI) sa mill-1963 daħal għal operazzjonijiet barra l-Komunità b’appoġġ għall-politika esterna tal-Komunità.

(2)

Il-parti l-kbira minn dawn l-operazzjonijiet twettqu fuq it-talba tal-Kunsill u bbenefikaw minn garanzija baġitarja tal-Komunità li ġiet amministrata mill-Kummissjoni. Reċentement, għall-perjodu 2000-2007, il-garanzija Komunitarja ġiet stabbilita fid-Deċiżjoni tal-Kunsill 2008/580/KE tat-23 ta’ Ġunju 2008 li tagħti garanzija Komunitarja lill-Bank Ewropew tal-Investiment kontra t-telf minn self għal proġetti barra l-Komunità (il-pajjiżi ġirien tax-Xlokk, il-pajjiżi Mediterranji, l-Amerika Latina u l-Ażja u r-Repubblika tal-Afrika ta’ Isfel) (2) u b’Deċiżjoni tal-Kunsill 2001/777/KE tas-6 ta’ Novembru 2001 li tagħti garanzija tal-Komunità lill-Bank Ewropew tal-Investiment kontra telf taħt azzjoni speċjali tas-self għal proġetti ambjentali magħżula fil-port tal-Baħar Baltiku tar-Russja taħt id-Dimensjoni tat-Tramuntana (3) u b’Deċiżjoni tal-Kunsill 2005/48/KE tat-22 ta’ Diċembru 2004 li tagħti garanzija Komunitarja lill-Bank Ewropew tal-Investiment kontra telf taħt self għal ċerti tipi ta’ proġetti fir-Russja, l-Ukraina, il-Moldova u l-Belarus (4) għal azzjonijiet ta’ self speċifiċi fuq livell reġjonali.

(3)

Bil-ħsieb li jsostni l-azzjoni esterna tal-Komunità mingħajr ma jaffettwa l-istanding tal-kreditu tal-BEI, il-Kunsill jixtieq ikompli jitlob lill-BEI biex iwettaq operazzjonijiet barra mill-Komunità u joffri lill-Bank garanzija baġitarja tal-Komunità għal operazzjonijiet ta’ dan it-tip. Filwaqt li jinkoraġġixxi lill-BEI biex iżid l-operazzjonijiet tiegħu mingħajr ma jirrikorri għall-garanzija Komunitarja, b’mod partikolari fil-pajjiżi ta’ Qabel l-Adeżjoni u fil-pajjiżi Mediterranji kif ukoll f’pajjiżi ta’ grad ta’ investiment f’reġjuni oħra, il-Kunsill jixtieq jikkjarifika n-natura tal-kopertura tal-garanzija Komunitarja bħala li tkopri ċerti riskji ta’ natura politika jew sovrana.

(4)

Il-garanzija Komunitarja għandha tkopri telf minn self jew garanziji ta’ self għall-proġetti ta’ investimenti eliġibbli għall-finanzjament mill-BEI li twettqu fil-pajjiżi koperti mill-Istrument għall-Għajnuna ta’ Qabel l-Adeżjoni (5) (“IPA”), l-Istrument Ewropew għall-Viċinat u s-Sħubija (6) (ENPI) u l-Istrument tal-Koperazzjoni għall-Iżvilupp (7) (DCI), fejn il-finanzjament jew garanzija ta’ self ingħata skont ftehim iffirmat li la skada u lanqas ġie kkanċellat (“operazzjonijiet ta’ finanzjament tal-BEI”).

(5)

L-ammonti koperti mill-garanzija tal-Komunità skont din id-Deċiżjoni għandhom jirrappreżentaw l-ogħla limiti għall-finanzjament mill-BEI skont il-garanzija tal-Komunità. Ma għandhomx jiffurmaw miri li l-BEI huwa marbut li jissodisfa.

(6)

Il-linji politiċi tar-relazzjonijiet esterni tal-Komunità ġew riveduti u mwessgħa’ fl-aħħar snin. Dan kien speċjalment il-każ għall-Istrateġija ta’ Qabel l-Adeżjoni għall-Politika tal-Viċinat Ewropew, għall-isħubiji l-ġodda mal-Amerika Latina u max-Xlokk tal-Ażja kif ukoll għas-Sħubija Strateġika tal-Unjoni Ewropea mar-Russja, mal-Ażja Ċentrali, maċ-Ċina u mal-Indja Dan huwa aktar il-każ fir-rigward tal-linji politiċi Komunitarji għall-iżvilupp, li issa ġew estiżi biex jinkludu lill-pajjiżi kollha li qegħdin jiżviluppaw. Dawk il-linji politiċi għall-iżvilupp huma pilastri tar-relazzjonijiet esterni tal-Komunità, li tagħti soluzzjoni mfassla apposta għall-ħtiġijiet tal-pajjiżi li qegħdin jiżviluppaw.

(7)

Ir-relazzjonijiet esterni tal-Komunità ġew sostnuti wkoll mill-istrumenti finanzjarji ġodda mill-2007, jiġifieri, l-IPA, l-ENPI, id-DCI, l-Istrument Ewropew għad-Demokrazija u d-Drittijiet Umani (EIDHR) (8) u mill-Istrument għall-Istabbiltà (9).

(8)

L-operazzjonijiet ta’ finanzjament tal-BEI għandhom ikunu konsistenti ma’ u għandhom isostnu l-politika esterna tal-Komunità inklużi l-għanijiet reġjonali speċifiċi u għandhom jikkontribwixxu biex jintlaħaq l-objettiv ġenerali msemmi fl-Artikoli 177 u 179 tat-Trattat, li jiġu promossi u kkonsolidati d-demokrazija u l-istat tad-dritt, id-drittijiet tal-bniedem u l-libertajiet fundamentali, u l-osservanza tal-ftehimiet internazzjonali dwar l-ambjent li tagħhom huma firmatarji l-Komunità Ewropea jew l-Istati Membri tagħha. Fir-rigward tal-pajjiżi li qed jiżviluppaw b’mod partikolari, l-operazzjonijiet ta’ finanzjament tal-BEI għandhom irawwmu: żvilupp ekonomiku u soċjali sostenibbli ta’ dawn il-pajjiżi, l-aktar fost dawk l-aktar żvantaġġjati fosthom; l-integrazzjoni bla intoppi u gradwali tagħhom fl-ekonomija dinjija; il-kampanja kontra l-faqar; l-objettv ġenerali tal-iżvilupp u t-tisħiħ tad-demokrazija u l-istat tad-dritt; l-objettiv ġenerali tar-rispett lejn id-drittijiet tal-bniedem u l-libertajiet fundamentali; kif ukoll il-konformità mal-objettivi ġenerali approvati mill-Kummissjoni fil-kuntest tan-Nazzjonijiet Uniti u ta’ organizzazzjonijiet internazzjonali kompetenti oħrajn. Billi jassigura koerenza ġenerali mal-azzjonijiet tal-Komunità, il-finanzjament tal-BEI għandu jkun komplementari għal linji politiċi, programmi u strumenti ta’ assistenza Komunitarja korrespondenti fir-reġjuni differenti. Barra minn hekk, il-protezzjoni tal-ambjent u s-sigurtà tal-enerġija tal-Istati Membri għandhom jifformaw parti mill-miri ta’ finanzjament tal-BEI fir-reġjuni eleġibbli kollha. L-operazzjonijiet ta’ finanzjament tal-BEI għandhom isiru f’pajjiżi li jikkonformaw ma’ kondizzjonijiet xierqa li huma konsistenti ma’ ftehimiet ta’ livell għoli tal-Komunità dwar aspetti politiċi u makroekonomiċi.

(9)

Id-djalogu politiku bejn il-Kummissjoni u l-BEI, kif ukoll l-ippjanar strateġiku u l-koerenza bejn il-BEI u l-finanzjament tal-Kummissjoni għandhom jissaħħew. Il-konnessjoni bejn l-attivitajiet tal-BEI barra mill-Komunità u l-politika tal-Komunità għandha tissaħħaħ permezz ta’ koperazzjoni mtejba bejn il-BEI u l-Kummissjoni fuq livell ċentrali kif ukoll fuq livell lokali. Koordinazzjoni msaħħa għandha tkopri, inter alia, konsultazzjoni bikrija fir-rigward ta’ kwistjonijiet ta’ politika, preparazzjoni ta’ dokumenti ta’ importanza reċiproka u l-pjanijiet għall-proġetti. Hija ta’ importanza partikolari l-konsultazzjoni bikrija dwar id-dokumenti ta’ programmazzjoni strateġika ppreparati mill-Kummissjoni, kif ukoll dwar id-dokumenti komparabbli tal-BEI, biex jiġu massimizzati s-sinerġiji bejn l-attivitajiet tal-BEI u tal-Kummissjoni u jitkejjel progress sabiex ikunu sodisfatti l-għanijiet tal-linji politiċi rilevanti tal-Komunità.

(10)

Fir-rigward tal-pajjiżi ta’ Qabel l-Adeżjoni, il-finanzjament tal-BEI f’dawk il-pajjiżi għandu jirrifletti l-prijoritajiet li ġew stabbiliti fis-Sħubijiet tal-Adeżjoni u dawk Ewropej, fil-ftehimiet ta’ Stabbilizzazzjoni u Assoċjazzjoni u fin-negozjati mal-Komunità. L-attenzjoni ffokata fuq l-azzjoni tal-Komunità fil-Balkani tal-punent għandha tkompli taqleb progressivament minn sostenn għal rikostruzzjoni għal sostenn ta’ qabel l-adeżjoni. F’dan il-kuntest, l-attività tal-BEI għandha, barra minn hekk, tfittex ukoll li tinkoraġġixxi l-aspett tal-bini tal-istituzzjonijiet, fejn ikun rilevanti, f’koperazzjoni mal-Istituzzjonijiet Finanzjarji Internazzjonali l-oħra li huma attivi fir-reġjun. Matul il-perjodu 2007-2011, il-finanzjament lill-pajjiżi kandidati (il-Kroazja, it-Turkija u l-ex-Repubblika Jugożlava tal-Maċedonja) għandu jsir dejjem aktar taħt il-Faċilità ta’ Qabel l-Adeżjoni li saret disponibbli mill-BEI, li għandha tiġi estiża maż-żmien biex tkopri l-pajjiżi kandidati potenzjali fil-Balkani tal-punent skont il-progress tal-proċess ta’ adeżjoni tagħhom.

(11)

Taħt il-mandat tal-Viċinat Ewropew, il-BEI għandu jkompli u jikkonsolida l-operazzjonijiet tiegħu fir-rigward tar-reġjun tal-Mediterran, iżid il-fokus tiegħu fuq l-iżvilupp tas-settur privat. F’dan ir-rigward, hemm bżonn ta’ koperazzjoni minn pajjiżi sħab biex ikun iffaċilitat l-iżvilupp tas-settur privat u t-tħeġġiġ ta’ riforma strutturali, b’mod partikolari riforma fis-settur finanzjarju, kif ukoll miżuri oħrajn biex jiffaċilitaw l-attivitajiet tal-BEI, b’mod partikolari biex ikun żgurat li l-BEI jkun jista’ joħroġ bonds fis-swieq lokali. Fir-rigward tal-Ewropa tal-Lvant, tal-Kawkasu t’Isfel u tar-Russja, il-BEI għandu jtejjeb l-attivitajiet tiegħu fil-pajjiżi kkonċernati b’mod konformi mal-kondizzjonalità xierqa li hija konsistenti ma’ ftehimiet ta’ livell għoli tal-Komunità mal-pajjiż ikkonċernat dwar aspetti politiċi u makroekonomiċi. F’dan ir-reġjun, il-BEI għandu jiffinanzja proġetti ta’ interess sinifikanti għall-Komunità fl-infrastruttura tat-trasport, tal-enerġija, tal-mezzi ta’ telekomunikazzjoni u tal-ambjent. Għandha tingħata prijorità lil proġetti fuq l-assi prijoritarja tan-Network Trans-Ewropew, proġetti b’implikazzjonijiet transkonfinali għal Stat Membru wieħed jew aktar u proġetti prinċipali li jiffavorixxu l-integrazzjoni reġjonali permezz ta’ konnettività akbar. Fis-settur tal-enerġija, proġetti strateġiċi għall-provvista tal-enerġija u għat-trasport tal-enerġija huma ta’ importanza partikolari, b’mod konformi mal-għan tal-politika Komunitarja li jiġu ddiversifikati s-sorsi tal-enerġija u bil-ħsieb li jiġu ggarantiti riżorsi stabbli u sikuri għall-konsumaturi. L-operazzjonijiet tal-finanzjament tal-BEI f’dan ir-reġjun għandhom jitwettqu f’koperazzjoni mill-qrib mal-Bank Ewropew għar-Rikostruzzjoni u l-Iżvilupp (EBRD), li t-termini tagħha għandhom jiġu stabbiliti f’Memorandum ta’ Ftehim bejn tliet partijiet bejn il-Kummissjoni, il-BEI u l-EBRD.

(12)

Il-finanzjament tal-BEI fil-pajjiżi Ażjatiċi u tal-Amerika Latina se jkun progressivament allinjat mal-istrateġija ta’ koperazzjoni tal-Unjoni f’dawn ir-reġjuni u se jkun komplementari għall-istrumenti ffinanzjati minn riżorsi baġitarji tal-Komunità. Il-BEI għandu jagħmel ħiltu biex jespandi progressivament l-attivitajiet tiegħu fuq numru akbar ta’ pajjiżi f’dawn ir-reġjuni, inkluż fil-pajjiżi l-inqas prosperużi. B’appoġġ għall-miri tal-Komunità, il-finanzjament tal-BEI fil-pajjiżi Ażjatiċi u tal-Amerika Latina għandu jiffoka fuq is-sostenibbiltà ambjentali (inkluża l-mitigazzjoni tal-bidla fil-klima) u fuq proġetti tas-sigurtà tal-enerġija, kif ukoll fuq appoġġ kontinwu għall-preżenza tal-Unjoni fl-Ażja u fl-Amerika Latina permezz ta’ investiment barrani dirett, u t-trasferiment ta’ teknoloġija u kapaċitajiet. Wara li jikkunsidra l-effiċjenza fl-infiq, il-BEI għandu jkun jista’ jaħdem direttament ukoll ma’ kumpaniji lokali, b’mod partikolari fil-qasam tas-sostenibbiltà ambjentali u s-sigurtà fl-enerġija. Ir-reviżjoni ta’ nofs it-terminu sejra teżamina mill-ġdid il-miri tal-finanzjament tal-BEI fl-Ażja u fl-Amerika Latina.

(13)

Fl-Ażja Ċentrali, il-BEI għandu jiffoka fuq proġetti kbar tal-provvista tal-enerġija u tat-trasport tal-enerġija li jaqdu wkoll l-interessi tal-enerġija tal-Komunità u li huma konsistenti ma’ u li jappoġġjaw il-miri tal-politika tal-Komunità tad-diversifikazzjoni tas-sorsi tal-enerġija u r-rekwiżiti ta’ Kyoto, u tat-titjib tal-protezzjoni ambjentali. Il-finanzjament tal-BEI fl-Ażja Ċentrali għandu jitwettaq f’koperazzjoni mill-qrib mal-EBRD, b’mod partikolari skont it-termini stabbiliti fil-Memorandum ta’ Ftehim Tripartitiku bejn il-Kummissjoni, il-BEI u l-EBRD.

(14)

Biex ikunu kkomplementati l-attivitajiet taħt il-Ftehim ta’ Sħubija bejn il-membri tal-Grupp tal-Istati tal-Afrika, tal-Karibew u tal-Paċifiku, minn naħa waħda, u l-Komunità Ewropea u l-Istati Membri tagħha, min-naħa l-oħra (10) (il-Ftehim ta’ Cotonou) għall-pajjiżi konċernati, fl-Afrika t’ Isfel, l-BEI għandu jiffoka fuq proġetti infrastrutturali ta’ interess pubbliku (inklużi infrastruttura muniċipali, provvista tal-enerġija u tal-ilma) u fuq is-sostenn tas-settur privat, inklużi l-impriżi żgħar u ta’ daqs medju. L-implimentazzjoni tad-dispożizzjonijiet dwar il-koperazzjoni ekonomika taħt il-Ftehim dwar il-Kummerċ, l-Iżvilupp u l-Koperazzjoni bejn il-Komunità Ewropea u l-Istati Membri tagħha, minn naħa waħda, u r-Repubblika tal-Afrika ta’ Isfel, min-naħa l-oħra (11), se tippromwovi aktar l-attivitajiet tal-BEI f’dan ir-reġjun.

(15)

Bil-għan li titjieb il-koerenza tal-appoġġ ġenerali tal-Komunità fir-reġjuni kkonċernati, għandhom jiġu esplorati opportunitajiet biex jiġi kkombinat il-finanzjament tal-BEI mar-riżorsi baġitarji tal-Komunità bix-xieraq, fil-forma ta’ sostenn għall-għotjiet, ta’ kapital ta’ riskju u ta’ sussidju għar-rati tal-interess flimkien ma’ għajnuna teknika għall-preparazzjoni, għall-implimentazzjoni jew għat-titjib tal-proġetti tal-qafas legali u regolatorju, permezz tal-IPA, l-ENPI, l-Istrumenti għall-Istabbilità, l-EIDHR u, għall-Afrika ta’ Isfel, id-DCI.

(16)

Il-BEI diġà jikkopera mill-qrib mal-istituzzjonijiet finanzjarji internazzjonali u ma’ istituzzjonijiet bilaterali Ewropej. Din il-koperazzjoni hija ggwidata minn Memoranda ta’ Ftehim speċifiċi għar-reġjuni li għandhom jiġu approvati mill-korpi regolatorji tal-BEI. Fl-operazzjonijiet ta’ finanzjament tiegħu barra l-Komunità li jidħlu fil-kamp ta’ applikazzjoni ta’ din id-Deċiżjoni, il-BEI għandu jagħmel ħiltu biex itejjeb aktar il-koordinament u l-koperazzjoni mal-istituzzjonijiet finanzjarji internazzjonali u mal-istituzzjonijiet bilaterali Ewropej fejn ikun rilevanti inkluż, fejn xieraq, koperazzjoni fuq il-kondizzjonalità tas-settur, użu akbar tal-kofinanzjament u parteċipazzjoni ma’ istituzzjonijiet finanzjarji internazzjonali oħrajn f’inizjattivi globali, bħalma huma dawk li jippromwovu l-koordinament tal-għajnuna u l-effiċjenza.

(17)

Ir-rappurtaġġ u t-trażmissjoni tal-informazzjoni mill-BEI u mill-Kummissjoni dwar l-Operazzjonijijet ta’ Finanzjament tal-BEI għandu jissaħħaħ. Fuq il-bażi tal-informazzjoni li tasal mingħand il-BEI, il-Kummissjoni għandha tirrapporta lill-Parlament Ewropew u lill-Kunsill dwar l-operazzjonijiet ta’ finanzjament tal-BEI mwettqa taħt din id-Deċiżjoni. Ir-rapport għandu, b’mod partikolari, jinkludi d-dokumenti strateġiċi u jinkludi taqsima fuq il-valur miżjud b’mod konformi mal-linji politiċi tal-Komunità, u taqsima dwar il-koperazzjoni mal-Kummissjoni, istituzzjonijiet finanzjarji internazzjonali oħrajn u donaturi bilaterali, inkluż dwar il-kofinanzjament.

(18)

Il-garanzija tal-Komunità stabbilita b’din id-Deċiżjoni għandha tkopri operazzjonijiet ta’ finanzjament tal-BEI ffirmati matul il-perjodu li jibda fl-1 ta’ Frar 2007 u jintemm fil-31 ta’ Ottubru 2011. Sabiex ikunu kapaċi jwieżnu l-iżviluppi matul l-ewwel nofs ta’ dak il-perjodu, il-BEI u l-Kummissjoni għandhom jippreparaw reviżjoni ta’ nofs it-terminu ta’ din id-Deċiżjoni. Tali reviżjoni għandha tinkludi b’mod partikolari evalwazzjoni esterna li t-termini ta’ referenza tagħha huma speċifikati fl-Anness II.

(19)

L-operazzjonijiet ta’ finanzjament tal-BEI għandhom ikomplu jiġu ġestiti skont ir-regoli u l-proċeduri tal-BEI stess, inklużi l-miżuri ta’ kontroll xierqa, kif ukoll permezz tar-regoli u tal-proċeduri rilevanti li jikkonċernaw il-Qorti tal-Awdituri u l-Uffiċju Ewropew kontra l-Frodi (OLAF).

(20)

Il-Fond ta’ Garanzija għal Azzjoni Esterna (il-“Fond ta’ Garanzija”), li ġie stabbilit mir-Regolament tal-Kunsill (KE, Euratom) Nru 2728/94 (12) għandu jkompli jipprovdi riserva ta’ likwidità għall-baġit Komunitarju kontra t-telf fuq operazzjonijiet ta’ finanzjament tal-BEI.

(21)

Il-BEI għandu jħejji, f’konsultazzjoni mal-Kummissjoni, programm multiannwali indikattiv tal-ammont ta’ firem tal-operazzjonijiet ta’ finanzjament tal-BEI sabiex jiġi żgurat ippjanar baġitarju xieraq għall-proviżjon tal-Fond ta’ Garanzija. Il-Kummissjoni għandha tqis dan il-pjan fil-programmazzjoni tal-baġit regolari tagħha trażmess lill-awtorità baġitarja.

(22)

Bis-sentenza tagħha tas-6 ta’ Novembru 2008 fil-każ C-155/07 (il-Parlament vs il-Kunsill), il-Qorti tal-Ġustizzja tal-Komunitajiet Ewropej annullat id-Deċiżjoni tal-Kunsill 2006/1016/KE tad-19 ta’ Diċembru 2006 li tagħti garanzija Komunitarja lill-Bank Ewropew tal-Investiment kontra telf minn self u garanziji għal self għal proġetti barra mill-Komunità (13). Id-Deċiżjoni 2006/1016/KE kienet ġiet estiża għal ħames pajjiżi tal-Ażja ċentrali (jiġifieri l-Każakistan, il-Kirgistan, it-Taġikistan, it-Turkmenistan u l-Użbekistan) mid-Deċiżjoni tal-Kunsill 2008/847/KE tal-4 ta’ Novembru 2008 dwar l-eliġibbiltà tal-pajjiżi tal-Ażja Ċentrali skont id-Deċiżjoni 2006/1016/KE (14).

(23)

Madankollu, il-Qorti ordnat li l-effetti tad-Deċiżjoni 2006/1016/KE jinżammu għall-arranġamenti ta’ finanzjament li jkun sar impenn fuqhom qabel id-dħul fis-seħħ, fi ħdan perjodu ta’ 12-il xahar mid-data tal-ħruġ tal-imsemmija sentenza, ta’ deċiżjoni ġdida adottata fuq il-bażi legali x-xierqa, jiġifieri l-Artikoli 179 u 181a tat-Trattat flimkien. Ir-riżultat ta’ dik is-sentenza huwa li l-proċedura ta’ kodeċiżjoni tapplika għall-attivazzjoni tal-mandat fakultattiv, għall-eleġibbiltà tal-pajjiżi mniżżla fl-Anness I, u għas-sospensjoni tal-finanzjament tal-BIE f’pajjiż speċifiku fil-każ ta’ tħassib serju dwar is-sitwazzjoni politika jew ekonomika.

(24)

Għaldaqstant għandha tiġi adottata Deċiżjoni ġdida tal-Parlament Ewropew u tal-Kunsill sabiex tistipula garanzija mhux mibdula kontinwa tal-operazzjonijiet ta’ finanzjament tal-BEI rilevanti barra mill-Komunità.

(25)

Madankollu, din id-Deċiżjoni għandha tiġi adottata malajr waqt li jkun żgurat li l-prerogattivi tal-Parlament Ewropew jiġu rrispettati b’mod sħiħ; għalhekk il-Kummissjoni għandha tressaq, qabel it-30 ta’ April 2010, proposta għal deċiżjoni ġdida waqt li tqis ukoll il-konklużjonijiet tar-reviżjoni ta’ nofs it-terminu.

(26)

Dik il-proposta għal deċiżjoni ġdida għandha tindirizza, fost oħrajn, il-kwistjoni ta’ aktar skrutinju mill-Parlament Ewropew u mill-Kunsill tad-deċiżjonijiet baġitarji u politiċi kollha meħuda mill-BEI u l-Kummissjoni fil-qafas ta’ dik id-Deċiżjoni l-ġdida, il-kwistjoni ta’ trasparenza tal-mekkaniżmu kollu ta’ finanzjament, u l-kwistjoni tal-limitazzjoni tal-garanzija Komunitarja meta mqabbla mal-krediti minfuqa,