|
16.3.2007 |
MT |
Il-Ġurnal Uffiċjali ta’ l-Unjoni Ewropea |
190 |
REGOLAMENT TAL-KUNSILL (KE) Nru 1185/2006
ta’ l-24 ta’ Lulju 2006
li jiddenunzja l-Ftehim bejn il-Komunità Ekonomika Ewropea u l-Gvern tar-Repubblika tal-Poplu ta’ l-Angola dwar is-sajd ’il barra mill-Angola u li jidderoga mir-Regolament (KE) Nru 2792/1999
IL-KUNSILL TA’ L-UNJONI EWROPEA,
Wara li kkunsidra t-Trattat li jistabbilixxi l-Komunità Ewropea, u partikolarment l-Artikolu 36 u l-Artikolu 37 flimkien ma’ l-Artikolu 300(2) u l-ewwel subparagrafu ta’ l-Artikolu 300(3) tiegħu,
Wara li kkunsidra l-proposta mill-Kummissjoni,
Wara li kkunsidra l-opinjoni tal-Parlament Ewropew (1),
Billi:
|
(1) |
Il-Ftehim bejn il-Komunità Ekonomika Ewropea u l-Gvern tar-Repubblika ta’ l-Angola dwar is-sajd ’il barra mill-Angola (2) (hawn aktar 'il quddiem imsejjaħ “il-Ftehim”) kien iffirmat f’Luanda fl-1 ta’ Frar 1989 u daħal fis-seħħ f’dik id-data skond l-Artikolu 15 tiegħu. |
|
(2) |
L-aħħar Protokoll anness mal-Ftehim, li jistabbilixxi, għall-perjodu mit-3 ta’ Awissu 2002 sat-2 ta’ Awissu 2004, l-opportunitajiet tas-sajd u l-kontribuzzjoni finanzjarja pprovduta mill-Ftehim (3), ma ġġeddidx minħabba li xi kundizzjonijiet fil-qafas leġiżlattiv il-ġdid fuq ir-Riżorsi Bijoloġiċi Akwatiċi adottat mill-Gvern tar-Repubblika ta’ l-Angola f’Ottubru 2004, kienu inkompatibbli mal-ħtiġijiet tal-Komunità għas-sajd mill-bastimenti tas-sajd tal-Komunità fl-ibħra ta’ l-Angola. |
|
(3) |
Għalhekk huwa xieraq li l-Ftehim jiġi denunzjat skond il-proċedura stabbilita fl-Artikolu 14 tiegħu. |
|
(4) |
Taħt ir-Regolament tal-Kunsill (KE) Nru 2792/1999 tas-17 ta’ Diċembru 1999 li jistabbilixxi r-regoli u l-arranġamenti dettaljati dwar l-assistenza strutturali tal-Komunità fis-settur tas-sajd (4), l-Istati Membri jistgħu jagħtu kumpens lis-sajjieda u lis-sidien tal-bastimenti għall-waqfien temporanju ta’ l-attivitajiet meta ftehim ta’ sajd ma jiġix imġedded, jew meta jkun sospiż, għall-flotot tal-Komunità li jiddependu mill-ftehim. L-għoti ta’ kumpens m’għandux itul aktar minn sitt xhur. Dan jista’ jiġġedded b’sitt xhur oħra kemm-il darba pjan ta’ konverżjoni approvat mill-Kummissjoni jitwettaq fil-konfront tal-flotta konċernata. |
|
(5) |
Fit-18 ta’ Lulju 2005 il-Kummissjoni adottat Deċiżjoni li tapprova l-pjan ta’ konverżjoni għall-bastimenti tas-sajd milqutin min-nuqqas ta’ tiġdid tal-protokoll tas-sajd bejn il-Komunità Ewropea u r-Repubblika ta’ l-Angola fi ħdan il-qafas tal-programm operattiv tal-FIFG relatat ma’ l-interventi strutturali tal-Komunità fis-settur tas-sajd għar-reġjuni Objettiv I fi Spanja matul il-perjodu 2000 sa 2006. |
|
(6) |
Bil-għan li jkun iffaċilitat it-twettiq ta’ dak il-pjan ta’ konverżjoni, bastimenti tas-sajd tal-Komunità koperti bil-pjan li, bħala riżultat taċ-ċaħda, iwaqqfu l-attivitajiet tagħhom taħt il-Ftehim għandhom ikunu eżentati minn ċerti dispożizzjonijiet tar-Regolament (KE) Nru 2792/1999. B’mod partikolari, dawn m’għandhomx ikunu suġġetti għall-obbligu li jirrimborżaw l-għajnuna pubblika għall-waqfien temporanju ta’ l-attivitajiet jew għat-tiġdid, modernizzazzjoni jew xiri ta’ apparat jew għall-obbligu li juru li kienu kontinwament attivi fis-sena qabel ma tħassru mir-reġistru tal-bastimenti tas-sajd tal-Komunità, |
ADOTTA DAN IR-REGOLAMENT:
Artikolu 1
Il-Ftehim bejn il-Komunità Ekonomika Ewropea u l-Gvern tar-Repubblika tal-Poplu ta’ l-Angola dwar is-sajd fl-ibħra ’l barra mill-Angola ffirmat f’Luanda fl-1 ta’ Frar 1989 huwa hawnhekk denunzjat f’isem il-Komunità.
Artikolu 2
Il-President tal-Kunsill huwa hawnhekk awtorizzat biex jinnomina l-persuna(i) bis-setgħa li jinnotifikaw lill-Gvern tar-Repubblika ta’ l-Angola bid-denunzja tal-Ftehim imsemmi fl-Artikolu 1.
Artikolu 3
1. Bastimenti tas-sajd tal-Komunità fil-lista tal-pjan ta’ konverżjoni approvat bid-Deċiżjoni tal-Komunità tat-18 ta’ Lulju 2005 m’għandhomx ikunu suġġetti għall-Artikolu 10 (3)(b)(ii) jew (4) tar-Regolament (KE) Nru 2792/1999 jew għall-punt 1.1(a) ta’ l-Anness III tiegħu.
2. Il-kapaċita' ta' kull bastiment li jibbenefika mid-deroga taħt l-Artikolu 10(4) tar-Regolament (KE) Nru 2792/1999 għandha tiġi kkunsidrata bħala ħruġ sostnut mill-għajnuna pubblika soġġetta għad-dispożizzjonijiet ta' l-Artikolu 11(3) tar-Regolament tal-Kunsill (KE) Nru 2371/2002 ta' l-20 ta' Diċembru 2002 dwar il-konservazzjoni u l-isfruttar sostenibbli tar-riżorsi tas-sajd taħt il-Politika Komuni tas-Sajd (5).
Artikolu 4
Dan ir-Regolament jidħol fis-seħħ fis-seba’ jum wara l-pubblikazzjoni tiegħu fil-Ġurnal Uffiċjali ta’ l-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussel, 24 ta’ Lulju 2006.
Għall-Kunsill
Il-President
M. PEKKARINEN
(1) Opinjoni tas-16.5.2006 (għadha mhux ippubblikata fil-Ġurnal Uffiċjali).
(2) ĠU L 268, 19.9.1987, p. 66.
(3) ĠU L 351, 28.12.2002, p. 92.
(4) ĠU L 337, 30.12.1999, p. 10, Regolament kif emendat l-aħħar mir-Regolament (KE) Nru 485/2005 (ĠU L 81, 30.3.2005, p. 1).