DEĊIŻJONI TAL-KUMITAT POLITIKU U TA' SIGURTÀ MONUC SPT/1/2006

tat-30 ta’ Mejju 2006

dwar l-aċċettazzjoni ta' kontributi ta' Stati terzi għall-operazzjoni militari ta' l-Unjoni Ewropea b'appoġġ għall-Missjoni ta' l-Organizzazzjoni tan-Nazzjonijiet Uniti fir-Repubblika Demokratika tal-Kongo (MONUC) matul il-proċess ta' l-elezzjoni

(2006/499/PESK)

IL-KUMITAT POLITIKU U TA' SIGURTÀ,

Wara li kkunsidra t-Trattat dwar l-Unjoni Ewropea u, b'mod partikolari t-tielet subparagrafu ta' l-Artikolu 25 tiegħu,

Wara li kkunsidra l-Azzjoni Konġunta tal-Kunsill 2006/319/PESK tas-27 ta' April 2006 dwar l-operazzjoni militari ta' l-Unjoni Ewropea li tappoġġa l-Missjoni ta' l-Organizzazzjoni tan-Nazzjonijiet Uniti fir-Repubblika Demokratika tal-Kongo (MONUC) matul il-proċess ta' l-elezzjoni (1) (l-Operazzjoni EUFOR RD Congo), u b'mod partikolari l-Artikolu 10(2) tagħha,

Billi:

(1)	Fuq talba tal-Kumitat Politiku u ta' Sigurtà u skond il-kompiti mogħtija mill-Kumitat Militari ta' l-Unjoni Ewropea (KMUE), il-Kmandant ta' l-Operazzjoni ta' l-UE u l-Kmandant tal-Forza ta' l-UE laqqgħu l-Konferenzi dwar il-Ħolqien u l-Forniment ta' Forza fit-3 u l-10 ta' Mejju 2006.

(2)	Fuq rakkomandazzjonijiet tal-Kmandant ta' l-Operazzjoni ta' l-UE u tal-KMUE dwar kontribut mit-Turkija, il-kontribut mit-Turkija għandu jiġi aċċettat.

(3)

Skond l-Artikolu 6 tal-Protokoll dwar il-pożizzjoni tad-Danimarka anness għat-Trattat dwar l-Unjoni Ewropea u għat-Trattat li jistabbilixxi l-Komunità Ewropea, id-Danimarka ma tipparteċipax fl-elaborazzjoni u l-implementazzjoni ta' deċiżjonijiet u azzjonijiet ta' l-Unjoni Ewropea li jkollhom implikazzjonijiet ta' difiża,

IDDEĊIEDA KIF ĠEJ:

Artikolu 1

Kontributi ta' Stati Terzi

Wara l-Konferenzi dwar il-Ħolqien u l-Forniment ta' Forza, il-kontribut mit-Turkija għandu jiġi aċċettat għall-operazzjoni militari ta' l-UE fir-Repubblika Demokratika tal-Kongo b'appoġġ għall-MONUC matul il-proċess ta' l-elezzjoni.

Artikolu 2

Dħul fis-seħħ

Din id-Deċiżjoni għandha tidħol fis-seħħ fil-jum ta' l-adozzjoni tagħha.