DEĊIŻJONI TAL-KUMMISSJONI

tat-2 ta’ Awwissu 2005

li tagħti rikonoxximent tas-sistema għall-identifikazzjoni u r-reġistrazzjoni ta’ l-annimali ovini fir-Repubblika ta’ l-Irlanda skond l-Artikolu 4(2)(d) tar-Regolament tal-Kunsill (KE) Nru 21/2004

(innotifikata taħt dokument numru C(2005) 2911)

(It-test bl-Ingliż biss huwa awtentiku)

(Test b'relevanza għaż-ŻEE)

(2005/597/KE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KE) Nru 21/2004 li jistabbilixxi sistema għall-identifikazzjoni u r-reġistrazzjoni ta’ l-annimali ovini u kaprini u li jemenda r-Regolament (KE) Nru 1782/2003 u d-Direttivi 92/102/KEE u 64/432/KEE (1), u b’mod partikolari l-Artikolu 4(2)(d) tiegħu,

Billi:

(1)	L-awtorità kompetenti ta’ l-Irlanda ressqet talba, mehmuża b'dokumentazzjoni xierqa, għar-rikonoxximent tas-sistema ta' identifikazzjoni u reġistrazzjoni ta' l-annimali ovini implimentata f'dak l-Istat Membru.

(2)	Wara missjoni veterinarja ta' spezzjoni tal-Kummissjoni fl-Irlanda, is-sistema ta’ identifikazzjoni u reġistrazzjoni ta’ l-annimali ovini ġiet awditjata mill-esperti tal-Kummissjoni bħala operattiva għal kollox sakemm jintlaħqu ċerti impenji.

(3)	L-Irlanda ħadet il-miżuri kollha xierqa biex tiżgura l-konformità mar-Regolament tal-Kunsill (KE) Nru 21/2004 sa mid-9 ta’ Lulju 2005.

(4)	L-awtorità kompetenti għandha twettaq kontrolli xierqa sabiex tivverifika l-implimentazzjoni xierqa tas-sistema ta’ identifikazzjoni u reġistrazzjoni ta’ l-annimali ovini.

(5)	Is-sistema ta’ identifikazzjoni u reġistrazzjoni ta’ l-annimali ovini fl-Irlanda għandha għalhekk tiġi approvata sabiex b’hekk issir is-sostituzzjoni tat-tieni mezz ta’ identifikazzjoni minn dik is-sistema, minbarra fil-każ ta' annimali involuti fil-kummerċ intra-Komunitarju.

(6)	Il-miżuri previsti f'din id-Deċiżjoni huma skond l-opinjoni tal-Kumitat Permanenti għall-Katina ta' l-Ikel u s-Saħħa ta' l-Annimali,

ADOTTAT DIN ID-DEĊIŻJONI:

Artikolu 1

Is-sistema għall-identifikazzjoni u r-reġistrazzjoni ta’ l-annimali ovini prevista skond l-Artikolu 4(2)(d) tar-Regolament tal-Kunsill (KE) Nru 21/2004 implimentata mir-Repubblika ta’ l-Irlanda hija hawnhekk rikonoxxuta bħala operattiva għalkollox sa mid-9 ta' Lulju 2005.

Artikolu 2

Bla ħsara għad-dispożizzjonijiet li għandhom jiġu stabbiliti skond l-Artikolu 10(1)(a) tar-Regolament tal-Kunsill (KE) Nru 21/2004 l-awtorità kompetenti se twettaq il-kontrolli xierqa kull sena biex tivverifika il-konformità minn dawk li jżommu l-annimali mar-rekwiżiti dwar l-identifikazzjoni u r-reġistrazzjoni ta’ l-annimali ovini.

Artikolu 3

Din id-Deċiżjoni hija indirizzata lill-Irlanda.