Id-Deċiżjoni tal-Kummissjoni

ta’ l-24 ta’ Jannar 2003

li temenda d-Deċiżjoni 2000/258/KE li tinnomina istitut speċifiku responsabbli għat-twaqqif ta’ kriterji meħtieġa sabiex ikunu standardizzati t-testijiet seroloġiċi biex jimmonitorjaw it-tilqim kontra l-idrofobija, fir-rigward ta’ l-approvazzjoni tal-laboratorji f’pajjiżi terzi.

(notifikata bid-dokument numru K(2003) 325)

(Test b’relevanza għaż-ŻEE)

(2003/60/KE)

IL-KUMMISSJONI TAL-KOMUNITAJIET EWROPEJ

Wara li kkunsidrat it-Trattat li jistabbilixxi il-Komunità Ewropea,

Wara li kkunsidrat id-Deċiżjoni tal-Kunsill 2000/258/KE, ta’ l-20 ta’ Marzu 2000, li tinnomina istitut speċifiku responsabbli għall-istabbiliment ta’ kriterji meħtieġa sabiex ikunu standardizzati t-testijiet seroloġiċi biex jimmonitorjaw it-tilqim kontra l-idrofobija [1], u, b’mod partikolari, l-Artikolu 4 tiegħu,

Billi:

(1) Afssa Nancy huwa l-laboratorju ta’ referenza għal testijiet seroloġiċi għal wara t-tilqim kontra l-idrofobija u huwa responsabbli mill-organizzazzjoni tat-test inter-laboratorju ta’ dispożizzjoni għall-approvazzjoni ta’ laboratorji li jixtiequ jwettqu dawk it-testijiet seroloġiċi.

(2) Afssa Nancy ippropona lill-Kummissjoni li laboratorji f’pajjiżi terzi li għaddew mit-test ta’ profiċjenza għandhom ikunu approvati.

(3) Huwa għalhekk meħtieġ li ssir proċedura għall-komunikazzjoni ta’ l-approvazzjoni ta’ laboratorji f’pajjiżi terzi.

(4) Id-Deċiżjoni Nru 2000/258/KE għandha tkun emendata skond dan.

(5) Il-miżuri msemmija f’din id-Deċiżjoni huma skond l-opinjoni tal-Kumitat Permanenti dwar il-Katina ta’ l-Ikel u s-Saħħa ta’ l-Annimali,

ADOTTAT DIN ID-DEĊIŻJONI:

Artikolu 1

Fl-Anness II tad-Deċiżjoni 2000/258/KEE, il-ħames inċiż huwa mibdul b’dan li ġej:

"— jikkollaboraw mal-laboratorji responsabbli li jwettqu dawn l-analiżi f’pajjiżi terzi u jikkomunikaw lill-Kummissjoni il-lista ta’ dawn il-laboratorji li għaddew mit-test inter-laboratorju ta’ dispożizzjoni (test ta’ profiċjenza). Dawn il-listi se jkunu pubblikati fuq il-website li ġej:

http://forum.europa.eu.int/Public/irc/sanco/vets/information"

.

Artikolu 2

Din id-Deċiżjoni hija ndirizzata lill-Istati Membri.

Magħmula fi Brussel, l-24 ta' Jannar 2003.

Għall-Kummissjoni

David Byrne

Membru tal-Kummissjoni

[1] ĠU L 79, tat-30.3.2000, p. 40.

--------------------------------------------------